డిజిటల్‌ చెల్లింపుదారులకు కళ్లు చెదిరేలా ప్రభుత్వ నజరానా

          గెల్చుకోండి రూ.కోటి 
          క్రిస్మస్‌ రోజు ప్రారంభం 
అంబేడ్కర్‌ జయంతినాడు మెగా డ్రా 

 దిల్లీ: అదృష్టం మీ తలుపు తట్టొచ్చు. రూ.కోటి మీ సొంతం కావచ్చు. కళ్లు చెదిరే ఈ మొత్తం దక్కాలంటే మాత్రం మీరొక పని చేయాలి. చెల్లింపులను ప్రభుత్వం పేర్కొన్న డిజిటల్‌ పద్ధతుల్లో చేయాలి. డిజిటల్‌ చెల్లింపులను ప్రోత్సహించడానికి ప్రభుత్వం రెండు లక్కీ డ్రా పథకాలను ప్రవేశపెట్టింది. వందరోజుల పాటు కొనసాగే ఈ పథకాల కింద మొత్తం రూ.340 కోట్ల విలువైన నగదు బహుమతులను పంపిణీ చేస్తుంది. క్రిస్మస్‌ రోజైన ఈ నెల 25న ఈ పథకాలు ప్రారంభమవుతాయి. వచ్చే ఏడాది ఏప్రిల్‌ 14న అంబేడ్కర్‌ జయంతి వరకు లక్కీడ్రాలు కొనసాగుతాయి. నీతి ఆయోగ్‌ సీఈఓ అమితాబ్‌కాంత్‌ ఈ పథకాల వివరాలనువెల్లడించారు. నేషనల్‌ పేమెంట్‌ కార్పొరేషన్‌ ఆఫ్‌ ఇండియా ద్వారా వీటిని అమలుచేయబోతున్నట్లు చెప్పారు. ఏప్రిల్‌14 తర్వాత కూడా ఈ పథకాలను కొనసాగించాలా?లేదా?అన్న అంశంపై ప్రభుత్వం నిర్ణయం తీసుకుంటుంది.

లక్కీ గ్రాహక్‌ యోజన:
* ఈ పథకం వినియోగదారులకు ఉద్దేశించింది. వందరోజులపాటు ప్రతి రోజూ 15వేల మంది అదృష్ట వినియోగదారులను డ్రాద్వారా ఎంపిక చేసి ఒక్కోరికి రూ.వెయ్యి బహుమతి ఇస్తారు.

* వారానికోసారి 7వేలమందికి డ్రా తీసి రూ.లక్ష, రూ.10వేలు, రూ.5వేలు బహుమతిగా అందిస్తారు.

* రూ.50 నుంచి రూ.3వేలలోపు లావాదేవీలు చేసేవారే ఇందుకు అర్హులు.

* రూపేకార్డు, యూపీఐ, ఎస్‌ఎస్‌ఎస్‌డీ, ఆధార్‌ ఆధారిత చెల్లింపులు జరిపేవారికి మాత్రమే ఈ ప్రోత్సాహకాలు ఇస్తారు. వీసా, మాస్టర్‌కార్డులు, ప్రైవేటు కంపెనీల ఈ-వ్యాలెట్లు వాడే వారు ఈ పథకాల పరిధిలోకి రారు. అలాగే వ్యక్తులమధ్య జరిగే లావాదేవీలు, ఒక బ్యాంకు ఖాతానుంచి మరోబ్యాంకు ఖాతాకుచేసే ఆన్‌లైన్‌ బదిలీలకూ ఇదివర్తించదు.

డిజి-ధన్‌ వ్యాపారి యోజన 
* డిజిటిల్‌ పద్ధతిలో లావాదేవీలు జరిపే వ్యాపారులకు ఈ పథకం వర్తిస్తుంది.

* ప్రతివారం డ్రా నిర్వహించి 7వేల మందికి రూ.50వేలు, రూ.5వేలు, రూ.2,500 ఇస్తారు.

ఈ పథకాలను వచ్చే ఏడాది ఏప్రిల్‌ 14న అంబేడ్కర్‌ జయంతినాడు ముగించనున్నారు. ఆ సందర్భంగా మెగా డ్రా నిర్వహిస్తారు. వినియోగదారుల్లో ప్రథమ విజేతకు రూ.కోటి, రెండో విజేతకు రూ.50 లక్షలు, మూడో విజేతకు రూ.25 లక్షలు అందిస్తారు.

* వ్యాపారులకు మొదటి బహుమతి కింద రూ.50లక్షలు, రెండో బహుమతికింద రూ.25 లక్షలు, మూడో బహుమతికింద రూ.5 లక్షలు అందిస్తారు. నవంబర్‌ 8 నుంచి ఏప్రిల్‌ 13వరకు జరిపిన డిజిటల్‌ లావాదేవీలను ఇందుకోసం పరిగణనలోకి తీసుకుంటారు.

* ఆధార్‌ ఆధారిత లావాదేవీలు, వినియోగదారులు-వ్యాపారులు, వినియోగదారులు-ప్రభుత్వ రంగ సంస్థల మధ్య జరిగిన రూ.50 నుంచి రూ.3వేలోపు డిజిటల్‌ లావాదేవీలను ఈ పథకాల కింద పరిగణనలోకి తీసుకుంటారు.

* లావాదేవీల గుర్తింపు సంఖ్య (ట్రాన్షాక్షన్‌ ఐడీ) ఆధారంగా విజేతలను ర్యాండం డ్రా ద్వారా ఎంపికచేస్తారు. ఇందుకోసం ఎన్‌సీపీఐ ప్రత్యేక సాఫ్ట్‌వేర్‌ అభివృద్ధిచేయనుంది.

* డిజిటల్‌ లావాదేవీలకు మళ్లని పేద, మధ్యతరగతివర్గాలను ప్రోత్సహించేందుకు రూపేకార్డులు, యూపీఐ, యూఎస్‌ఎస్‌డీ, ఆధార్‌ఆధారిత చెల్లింపులను మాత్రమే డ్రాలోకి తీసుకుంటున్నారు.

డిజిటల్‌ చెల్లింపులను ప్రోత్సహించడానికి ప్రభుత్వం ప్రకటించిన రెండు లక్కీడ్రా పథకాలను ప్రధాని మోదీ.. గుర్తుంచుకునే క్రిస్మస్‌కానుకగా అభివర్ణించారు. ఈ పథకాలు డిజిటల్‌ చెల్లింపులను మరింత ప్రోత్సహిస్తాయని ట్వీట్‌ చేశారు. అవినీతి రహిత భారత్‌ దిశగా పయనించేందుకు ఈ చర్య దోహదం చేస్తుందని ప్రధాని కార్యాలయం ట్వీట్‌ చేసింది.